മംഗളൂരു (www.mediavisionnews.in): സിറ്റി പോലീസ് കമ്മിഷണറായ വിപുൽകുമാറിനെ സ്ഥലംമാറ്റി. മൈസൂരു പോലീസ് അക്കാദമിയിലെ ഐ.ജി.യായാണ് മാറ്റം.
കഴിഞ്ഞ നിയമസഭാ തിരഞ്ഞെടുപ്പിന്റെ ഭാഗമായി ഏപ്രിലിലാണ് വിപുൽകുമാറിനെ മംഗളൂരു കമ്മിഷണറായി നിയമിച്ചത്. നിലവിൽ ആർക്കും മംഗളൂരു പോലീസ് കമ്മിഷണറുടെ ചുമതല നൽകിയിട്ടില്ല.
ബന്തിയോട് (www.mediavisionnews.in): ബന്തിയോട് മുസ്ലിം യുവജന വേദിയുടെ ആഭിമുഖ്യത്തിൽ ബദ്‌രിയ ജുമാ മസ്ജിദിൽ സമൂഹ നോമ്പ്തുറ സംഘടിപ്പിച്ചു.
നാടിന്റെ നാനാഭാഗങ്ങളിൽ നിന്നും എത്തിച്ചേർന്ന നൂറ് കണക്കിനു ജനങ്ങൾ ഒത്ത് കൂടിയ നോമ്പ് തുറ നാടിനു പുത്തൻ ഉണർവ്വായി.
വിവിധ രാഷ്ട്രീയ സാമൂഹ്യ സാംസ്കാരിക രംഗത്തെ പ്രമുഖർ സംന്ധിച്ചു.
യുഎഇ(www.mediavisionnews.in): യുഎഇയില്‍ ശക്തമായ കാറ്റ് വീശാനും കടലില്‍ തിരമാല ഉയരാനും സാധ്യതയുണ്ടെന്ന് നാഷണല്‍ സെന്റര്‍ ഓഫ് മെട്രോളജി അറിയിച്ചു. ഉച്ചയ്ക്ക് ശേഷം തെളിഞ്ഞ കാലാസ്ഥയാകുമെങ്കിലും ചില ഒറ്റപ്പെട്ട സ്ഥലങ്ങളില്‍ പൊടിക്കാറ്റ് വീശാനും , അറേബ്യന്‍ ഗള്‍ഫ് തീരങ്ങളില്‍ കടല്‍ രൂക്ഷമാകാനും സാധ്യതയുണ്ട്. അതേസമയം ഒമാനില്‍ കടല്‍ ശാന്തമായിരിക്കുമെന്നും യുഎഇയില്‍ തിരമാല 8 അടി ഉയരത്തില്‍ എത്തിയേക്കുമെന്നും സൂചനയുണ്ട്.
യുഎഇയില്‍ താപനില ഇനിയും ഉയരാനാണ് സാധ്യതയുള്ളത്. കഴിഞ്ഞദിവസം ഏറ്റവും കൂടിയ താപനിലയാണ് മെസൈറയില്‍ രേഖപ്പെടുത്തിയത്.
കാസറഗോഡ് (www.mediavisionnews.in): നീണ്ട വർഷകാലം കാസറഗോഡ് ജില്ലാ പോലീസിൽ സേവനം അനുഷ്ഠിച്ചിരുന്നു ടി പി രഞ്ജിത്ത് വീണ്ടും കാസറഗോഡിലേക്ക്. കോഴിക്കോട് ആഭ്യന്തര സുരക്ഷ ഏജന്‍സിയില്‍ നിന്നാണ് ടി.പി. രഞ്ജിത്തിനെ കാസര്‍കോട് സി.ബി.സി.ഐ.ഡിയിലേക്കും മാറ്റിയത്.
കാഞ്ഞങ്ങാട് ഡി.വൈ.എസ്.പിയായി പി. കെ. സുധാകരനെ നിയമിച്ചു. കോഴിക്കോട് സിറ്റിയില്‍ നിന്നാണ് സുധാകരനെ മാറ്റി നിയമിച്ചത്. കാഞ്ഞങ്ങാട് നിന്നും കെ. ദാമോദരനെ കാസര്‍കോട് വിജിലന്‍സിലേക്ക് മാറ്റി. സുധാകരന്‍ ചിറ്റാരിക്കല്‍ കമ്മാടം സ്വദേശിയാണ്
തിരുവനന്തപുരം (www.mediavisionnews.in):തിരുവനന്തപുരം വെള്ളയമ്പലത്തുള്ള കെപിസിസി ആസ്ഥാനമായ ഇന്ദിരാഭവന്‍ ഒഎല്‍എക്‌സില്‍ വില്‍പനയ്ക്ക് വെച്ച് കോണ്‍ഗ്രസ് പ്രവര്‍ത്തകന്‍. അജയ് എസ് മേനോന്‍ എന്ന കോണ്‍ഗ്രസ് പ്രവര്‍ത്തകനാണ് ഇന്ദിരാഭവന്‍ പതിനായിരം രൂപയ്ക്ക് ഒഎല്‍എക്‌സില്‍ വില്‍പനയ്ക്ക് വെച്ചത്. രാജ്യസഭാ സീറ്റ് കേരളാ കോണ്‍ഗ്രസിന് നല്‍കിയതില്‍ പ്രതിഷേധം പുകയുന്നതിനിടെയാണ് ഇത്.
കെട്ടിടത്തിന്റെ ചിത്രം ഉള്‍പ്പെടെയാണ് പരസ്യം നല്‍കിയിരിക്കുന്നത്. കോണ്‍ഗ്രസ് ആസ്തി വില്‍പ്പനയ്ക്ക് എന്ന പദ്ധതിയുടെ ഭാഗമായാണ് ഈ വില്‍പ്പനയെന്ന് ഒഎല്‍എക്‌സ് പരസ്യത്തില്‍ പറയുന്നു. ഇവിടെ എല്ലാവിധ ഫര്‍ണിച്ചറുകളുമുണ്ടെന്നും വാങ്ങുന്നവര്‍ക്ക് ഉടന്‍ ഏറ്റെടുക്കാനാകുമെന്നും പരസ്യത്തില്‍ പറയുന്നു.
കോണ്‍ഗ്രസിനകത്ത് വലിയ തോതിലുള്ള പ്രതിഷേധമാണ് രാജ്യസഭാ സീറ്റ് കേരളകോണ്‍ഗ്രസിന് നല്‍കിയതില്‍ ഉയര്‍ന്നത്. ഉമ്മന്‍ചാണ്ടിയുടേയും ചെന്നിത്തലയുടേയും ചിത്രങ്ങളില്‍ കരി ഓയിലൊഴിച്ചും കോലം കത്തിച്ചുമൊക്ക പ്രവര്‍ത്തകര്‍ പ്രതിഷേധിച്ചിരുന്നു.
ഇസ്രായേല്‍ വെടിവയ്പ്പില്‍ മരിച്ച നഴ്‌സ് റസാന്‍ അല്‍ നജ്ജാറിന്റെ മാതാവ് ആതുരസേവന രംഗത്തേക്ക്. ഗാസയിലെ മെഡിക്കല്‍ ക്യാംപില്‍ റസാന്റെ അമ്മയും സഹോദരിയും പങ്കെടുത്തു. ഇസ്രായേല്‍ ആക്രമണത്തില്‍ പരിക്കേറ്റവരെ ശുശ്രൂഷിക്കുന്ന മെഡിക്കല്‍ ക്യാംപിലാണ് ഇരുവരുമെത്തിയത്. വെടിയേല്‍ക്കുമ്പോള്‍ റസാന്‍ ധരിച്ചിരുന്ന യൂണിഫോം ധരിച്ചാണ് മാതാവ് സബ്രീന്‍ അല്‍ നജ്ജാറെത്തിയത്.
ഞങ്ങള്‍ നിരായുധരാണ്. പക്ഷേ ഞങ്ങളുടെ കയ്യില്‍ സ്‌നേഹത്തിന്റെയും സമാധാനത്തിന്റേയും സന്ദേശമുണ്ട്.റസാന്‍ ലോകത്തിനു മുന്നില്‍ പറയാനാഗ്രഹിച്ച സന്ദേശം പ്രചരിപ്പിക്കാനും യുദ്ധത്തിനെതിരെ പോരാടാനുമാണ് ഞങ്ങളുടെ ലക്ഷ്യം. നിരായുധരായ പലസ്തീന്‍ ജനതയോട് അനീതിയാണ് ഇസ്രായേല്‍ ഭരണകൂടം കാണിക്കുന്നതെന്നും ഇസ്രായേലിന്റെ യുദ്ധക്കൊതിക്ക് തങ്ങളെ തോല്‍പ്പിക്കാനാവില്ലെന്നും റസാന്റെ മാതാവ് പറഞ്ഞു.
”പരിക്കേല്‍ക്കുന്നവരില്‍ സ്ത്രീകളുമുണ്ട്. അവരെ ആര് ശുശ്രൂഷിക്കും. ഒരു പുരുഷന് സാധിക്കില്ല എന്നല്ല. പക്ഷേ ഞങ്ങള്‍ക്കിവിടെ വലിയ റോളുണ്ട്. ജനങ്ങളുടെ സംരക്ഷണമാണ് ഞങ്ങളുടെ ലക്ഷ്യം. ആയുധങ്ങളില്ലാതെ നമുക്കതിന് സാധിക്കും. ഞങ്ങളിത് പണത്തിന് വേണ്ടിയല്ല ചെയ്യുന്നത്. ദൈവത്തിന് വേണ്ടിയാണ്. ഇത് ചെയ്യുന്നതിന് ഞങ്ങള്‍ക്ക് വേതനം വേണ്ട”
യുദ്ധഭൂമിയില്‍ കഷ്ടപ്പെടുന്നവരെ പരിചരിക്കാനാണ് ഇവിടെ എത്തിയത്. തന്റെ സഹോദരിയുടെ യാത്ര അവസാനം വരെ പിന്തുടരുമെന്നും റസാന്റെ സഹോദരി റയാന്‍ അല്‍ നജ്ജാര്‍ പറഞ്ഞു. യുദ്ധഭൂമിയില്‍ പരുക്കേറ്റവരുടെ ജീവന്‍ രക്ഷിക്കാന്‍ തന്റെ ജീവന്‍ കൊടുക്കാനും തയ്യാറാണെന്നും റയാന്‍ പറഞ്ഞു.
തിരുവനന്തപുരം (www.mediavisionnews.in): സംസ്ഥാനത്ത് കാലവര്‍ഷം ശക്തമായതോടെ മഴക്കെടുതിയും അപകട മരണങ്ങളും വര്‍ദ്ധിക്കുന്നു. നാലുവയസ്സുകാരി ഉള്‍പ്പെടെ പത്ത് പേരാണ് ഇതുവരെ കാലവര്‍ഷത്തില്‍ മരിച്ചത്. കാസര്‍ഗോഡ് കുശാല്‍നഗര്‍ സ്വദേശിയായ എല്‍കെജി വിദ്യാര്‍ഥിനി നാലുവയസ്സുകാരി ഫാത്തിമ, തിരുവനന്തപുരം നെയ്യാറ്റിന്‍കര സ്വദേശി ദീപ, കോഴിക്കോട് ചാലിയത്ത് ഖദീജ, എടത്വാ തലവടിയില്‍ വിജയകുമാര്‍, കാസര്‍ഗോഡ് അഡൂര്‍ സ്വദേശി ചെനിയ നായിക്, ബാലരാമപുരം പുന്നക്കാട്ട് പൊന്നമ്മ, പടിഞ്ഞാറ്റയില്‍ ഗംഗാധരന്‍ എന്നിവരടക്കം ഇതുവരെ പത്ത് പേരാണ് മരിച്ചത്.
കോഴിക്കോട് കടലുണ്ടി ചാലിയത്ത് കുരുക്കല്‍കണ്ടിയാല്‍ ഖദീജ തെങ്ങ് ദേഹത്ത് വീണാണ് മരിച്ചത്. അറുപതുകാരിയായ ഖദീജ സക്കാത്തിനായി നടക്കുമ്ബോള്‍ ഒരു വീടിനു മുന്നിലെ തെങ്ങ് വീണാണ് അപകടം സംഭവിച്ചത്. സംസ്ഥാനത്തിന്റെ വിവിധ ഭാഗങ്ങളില്‍ കടലാക്രമണം രൂക്ഷമാകുകയാണ്. ഇടുക്കി, കോഴിക്കോട്, തിരുവനന്തപുരം, കണ്ണൂര്‍, തൃശൂര്‍ ജില്ലകളിലാണ് കാലവര്‍ഷം കൂടുതല്‍ നാശം വിതയ്ക്കുന്നത്.
കാസര്‍ഗോഡ് കനത്ത മഴയില്‍ വ്യാപക നാശനഷ്ടങ്ങളാണ് റിപ്പോര്‍ട്ട് ചെയ്തിരിക്കുന്നത്. മലയോര മേഖലയിലാണ് കൂടുതല്‍ അപകടങ്ങള്‍. ഉരുള്‍പൊട്ടലുണ്ടാകാന്‍ സാധ്യതയുള്ളതിനാല്‍ പ്രദേശത്തെ ജനങ്ങള്‍ക്ക് ജാഗ്രതാ നിര്‍ദ്ദേശം നല്‍കിയിട്ടുണ്ട്. ജില്ലയിലെ താഴ്ന്ന പ്രദേശങ്ങളും അപകട ഭീതിയിലാണ്. തീരദേശവാസികള്‍ ജാഗരൂകരായിരിക്കണമെന്ന് ജില്ലാ കലകക്ടര്‍ നിര്‍ദ്ദേശം നല്‍കിയിട്ടുണ്ട്. ജില്ലയില്‍ പലയിടത്തും കണ്‍ട്രോള്‍ റൂം തുറന്നിട്ടുണ്ട്.
കോഴിക്കോട് ജില്ലയില്‍ 23 വീടുകള്‍ ഭാഗികമായും മൂന്ന് വീടുകള്‍ പൂര്‍ണമായം തകര്‍ന്നു. താമരശേരി താലൂക്കിലെ കിനാലൂര്‍ വില്ലേജില്‍ ഒരു വീടിന് സ്ലാബിന് വിള്ളലുണ്ടായി. ആയ ബേരി വില്ലേജ് പരിധിയില്‍ മരം വീണ് ഒരാള്‍ക്ക് പരിക്കേറ്റു രവീന്ദ്രന്‍ നരിപ്പറ്റക്കാണ് പരുക്കേറ്റത്.
കാലവര്‍ഷം ശക്തമായ സാഹചര്യത്തില്‍ കോഴിക്കോട് ജില്ലയിലെ എല്ലാ താലൂക്കുകളിലും കണ്‍ട്രോള്‍ റൂം പ്രവര്‍ത്തനം തുടങ്ങിയതായി ജില്ലാ കളക്ടര്‍ യുവി ജോസ് പറഞ്ഞു. ദുരിതബാധിതരെ ആവശ്യമാണെങ്കില്‍ പുനരധിവസിപ്പിക്കുന്നതിന് സൗകര്യമേര്‍പ്പെടുത്തിയിട്ടുണ്ട്. കാറ്റും മഴയും ശക്തമായതിനാല്‍ ജില്ലാ ഭരണകൂടം ജാഗ്രത പാലിക്കുകയാണ്. ജില്ലാ ആസ്ഥാനത്തും താലൂക്കുകളിലും ഇരുപത്തിനാല് മണിക്കൂറും കണ്‍ട്രോള്‍ റൂം പ്രവര്‍ത്തിക്കും. 04952371002 എന്ന നമ്ബറില്‍ വിളിച്ചാല്‍ കോഴിക്കോട് കണ്‍ട്രോള്‍ റൂമുമായി ബന്ധപ്പെടാം. കടല്‍ പ്രക്ഷുബധമായതിനാല്‍ കടലില്‍ പോകരുതെന്ന് മത്സ്യത്തൊഴിലാളികള്‍ക്ക് ജാഗ്രതാ നിര്‍ദ്ദേശം നല്‍കിയിട്ടുണ്ട്.
കൊച്ചിയിലും പത്തിലേറെ വീടുകളില്‍ വെള്ളം കയറി. അടിമാലി-മൂന്നാര്‍ റൂട്ടില്‍ രണ്ടാം മൈലിനു സമീപം ഉരുള്‍പൊട്ടലുണ്ടായി. കനത്ത് മഴയില്‍ കൊച്ചി-മധുര ദേശീയ പാതയില്‍ മണ്ണിടിച്ചിലുണ്ടായി. മൂന്നാറിലേക്കുള്ള ഗതാഗതം പൂര്‍ണ്ണമായും സ്തംബിച്ചു. ഇന്ന് പുലര്‍ച്ചെയാണ് കൊച്ചി-മധുര ദേശീയ പാതയില്‍ മണ്ണിടിച്ചിലുണ്ടായത്. പ്രദേശത്ത് ശക്തമായ കാറ്റും ഇടിയും മിന്നലോടും കൂടിയ കനത്ത മഴയും തുടരുകയാണ്. രണ്ട് ദിവസമായി തുടരുന്ന കനത്ത മഴയില്‍ ഹൈറേഞ്ച് ഭാഗങ്ങളെല്ലാം ഒറ്റപ്പെട്ട സ്ഥിതിയിലാണ്.
മദീന (www.mediavisionne: ദമാമില്‍നിന്നും മക്കയില്‍ വിശുദ്ധ ഉംറക്കെത്തി തിരിച്ച്‌ മദിനാ സന്ദര്‍ശനത്തിനുള്ള യാത്രാമധ്യേ, മദീനയിലുണ്ടായ വാഹനാപകടത്തില്‍ ഇന്ന് രാവിലെ തൃശൂര്‍ വാടാനപള്ളി സ്വദേശികളായ രണ്ട് കുട്ടികള്‍മരിച്ചു. ദമാം ടയോട്ട തഹ്‌വീല്‍ അല്‍രാജി ബാങ്കിന് എതിര്‍വശം താമസിക്കുന്ന തൃശൂര്‍ വാടാനപള്ളി ഷാഹുല്‍ ഹമീദ് സല്‍മ ദമ്ബതികളും കുടുംബവും സഞ്ചരിച്ച വാഹനമാണ് അപകടത്തില്‍പെട്ടത്. ഇവരുടെ മക്കള്‍ ആയിശ, ഫാത്ത്വിമ എന്നീ കുട്ടികകളാണ് മരിച്ചത്.
തിരുവനന്തപുരം (www.mediavisionnews.in): കനത്ത കാറ്റിലും മഴയിലും രണ്ട് മാസം പ്രായമുള്ള കുഞ്ഞിനെ ഉറക്കിക്കിടത്തിയിരുന്ന തൊട്ടിലുള്‍പ്പെടെ മേല്‍ക്കൂര പറന്നുമാറി. മേല്‍കൂര അടുത്തുള്ള മരത്തില്‍ തട്ടി നിന്നതിനാല്‍ കുഞ്ഞ് അദ്ഭുതകരമായി രക്ഷപ്പെട്ടു.
തിരുവനന്തപുരം വെങ്ങാനൂരിലാണ് സംഭവം. ഷീറ്റ് മേഞ്ഞ മേല്‍കൂരയിലാണ് തൊട്ടില്‍ കെട്ടിയിരുന്നത്. ഇതില്‍ നല്‍കിയിട്ടുള്ള കമ്പിയിൽ രണ്ട് മാസം പ്രായമുള്ള കുഞ്ഞിനെ കിടത്തുന്നതിനായി തൊട്ടിലും കെട്ടിയിരുന്നു. എന്നാല്‍, ശക്തമായ കാറ്റ് വീശിയതിനെ തുടര്‍ന്ന് മേല്‍ക്കൂര പറന്നുമാറുകയായിരുന്നു. ഈ സമയം കൂഞ്ഞ് തൊട്ടിലില്‍ ഉറങ്ങുന്നുണ്ടായിരുന്നു.
പറന്നുമാറിയ മേല്‍ക്കൂര സമീപത്തെ തെങ്ങില്‍ തട്ടി നില്‍ക്കുകയായിരുന്നു. തുടര്‍ന്ന് കുഞ്ഞ് തൊട്ടിലില്‍ തൂങ്ങി കിടക്കുകയായിരുന്നു. സംഭവത്തെ തുടര്‍ന്ന് മാതാപിതാക്കളുടെ കരച്ചില്‍ കേട്ടെത്തിയ നാട്ടുകാരാണ് ഏണി ഉപയോഗിച്ച്‌ മുകളില്‍ കയറി കുഞ്ഞിനെ രക്ഷപ്പെടുത്തിയത്.
താഴെ എത്തിച്ച കുഞ്ഞിനെ പ്രാഥമിക ചികിത്സയ്ക്കായി ഉടന്‍ തന്നെ ആശുപത്രിയില്‍ പ്രവേശിപ്പിച്ചു. കുഞ്ഞിന്റെ ആരോഗ്യനില തൃപ്തികരമാണെന്ന് ഡോക്ടര്‍മാര്‍ അറിയിച്ചു. കുമാര്‍-ഷീബ ദമ്ബതികളുടെ കുഞ്ഞാണ് മേല്‍കൂരയ്‌ക്കൊപ്പം പറന്നു പോയത്.
