തൊടുപുഴ(www.mediavisionnews.in): വിവാഹവസ്ത്രം എടുക്കാനെത്തിയ യുവതിയെ ‘സിനിമാ സ്റ്റൈലില്‍’ വിളിച്ചിറക്കി കൊണ്ടുപോകാനുള്ള കാമുകന്റെ ശ്രമം ഒടുവില്‍ കലാശിച്ചത് കൂട്ടയടിയില്‍. പെണ്‍കുട്ടിയെ തടയാന്‍ ശ്രമിച്ച സഹോദരനെയവും പ്രതിശ്രുത വരനെയും കാമുകനും ഒപ്പമുണ്ടായിരുന്ന സുഹൃത്തുക്കളും ചേര്‍ന്ന് മര്‍ദ്ദിച്ചു. കിട്ടിയ അടി തിരിച്ചടിച്ചതോടെ പ്രശ്‌നം ഗുരുതരമായി. ഇരുകൂട്ടരും തമ്മിലുള്ള സംഘര്‍ഷം മിനിറ്റുകളോളം നീണ്ടു. റോഡ് ഗതാഗതം തടസ്സപ്പെടുത്തികൊണ്ടായിരുന്നു കൂട്ടയടി.

ഒടുവില്‍ തൊടുപുഴ പോലീസെത്തി യുവതിയെയും ഗുജറാത്തില്‍ എന്‍ജിനീയറായ കാമുകനെയും പ്രതിശ്രുതവരനെയും ബന്ധുക്കളെയും സ്റ്റേഷനില്‍ എത്തിച്ചു. സംഭവത്തില്‍ ആറുപേര്‍ക്കെതിരെ പോലീസ് കേസെടുത്തു. യുവതിയെ പോലീസ് തൊടുപുഴ മൈലക്കൊമ്ബിലെ ഷെല്‍ട്ടര്‍ ഹോമിലാക്കി. വ്യാഴാഴ്ച കോടതിയില്‍ ഹാജരാക്കുകയോ വീട്ടുകാരുമായി സംസാരിച്ച്‌ പ്രശ്‌നം പരിഹരിക്കുകയോ ചെയ്യുമെന്ന് പോലീസ് അറിയിച്ചു.

ബുധനാഴ്ച ഉച്ചയ്ക്ക് രണ്ടരയോടെയാണ് സംഭവം. ഉടുമ്ബന്നൂര്‍ സ്വദേശിയായ യുവതിയും പാലക്കുഴ സ്വദേശിയായ പ്രതിശ്രുതവരനും എട്ടുവര്‍ഷമായി പ്രണയത്തിലായിരുന്നു. നാലുവര്‍ഷം മുമ്ബ് പാലക്കുഴ സ്വദേശി ഗള്‍ഫില്‍ പോയി. ഈ സമയം ബംഗളൂരുവില്‍ ജോലിക്കെത്തിയ പെണ്‍കുട്ടി ഈരാറ്റുപേട്ട സ്വദേശിയായ യുവാവുമായി പ്രണയത്തിലായി. ഇതിനിടെ പാലക്കുഴ സ്വദേശി ഗള്‍ഫില്‍നിന്ന് ബംഗളൂരുവിലേക്ക് തിരികെവന്നു. ഇതോടെ ഇരുവരും വിവാഹം കഴിക്കാന്‍ തീരുമാനിച്ചു. വീട്ടുകാരുടെ സമ്മതത്തോടെ വിവാഹനിശ്ചയവും നടന്നു.

വിവരം യുവതിയില്‍നിന്ന് അറിഞ്ഞ കാമുകന്‍ ബുധനാഴ്ച രാവിലെ ഗുജറാത്തില്‍നിന്ന് വിമാനമാര്‍ഗം നെടുമ്ബാശ്ശേരിയിലെത്തി. അവിടെനിന്ന് ടാക്സിയില്‍ തൊടുപുഴയിലെത്തി. വിവാഹവസ്ത്രം എടുത്തുകൊണ്ടിരുന്ന യുവതിയെ വിളിച്ചിറക്കി കൊണ്ടുപോകാന്‍ ശ്രമിച്ചതാണ് സംഘര്‍ഷത്തിലേയ്ക്ക് വഴിവെച്ചത്. ഒടുവില്‍ പോലീസെത്തി കാര്യം അന്വേഷിച്ചതോടെ വിവാഹം നിശ്ചയിച്ചത് പെണ്‍കുട്ടിയുടെ അറിവോടെയാണെന്ന് മനസ്സിലായി. ഇതോടെ പ്രശ്‌നങ്ങള്‍ക്ക് അയവ് വരുകയായിരുന്നു.

നിപ വൈറസ് ബാധയുടെ ഭീതി ഒഴിയുംമുമ്ബ് സംസ്ഥാനം വീണ്ടും പകര്‍ച്ചപ്പനി ഭീഷണിയില്‍. ഡെങ്കി, മലേറിയ, എലിപ്പനി, പകര്‍ച്ചപ്പനി എന്നിവയാണ് ഭീഷണിയായിരിക്കുന്നത്.

ദിവസം ശരാശരി മുപ്പതിലധികം പേര്‍ക്ക് ഡെങ്കിപ്പനി സ്ഥിരീകരിക്കുന്നുണ്ടെന്നാണ് ആരോഗ്യവകുപ്പിന്റെ കണക്ക്. കാസര്‍കോട് ജില്ലയാണ് ഡെങ്കിഭീഷണിയില്‍ മുന്നില്‍. ജൂണില്‍മാത്രം അറുപതിലധികം പേര്‍ ചികിത്സതേടി. മിക്ക ജില്ലകളിലും എലിപ്പനിയും റിപ്പോര്‍ട്ട് ചെയ്യുന്നുണ്ട്. തിരുവനന്തപുരം, കൊല്ലം, കോഴിക്കോട്, കണ്ണൂര്‍ ജില്ലകളില്‍ മലേറിയയും തലപൊക്കിയിട്ടുണ്ട്. മേയില്‍മാത്രം 436 പേര്‍ ഡെങ്കിപ്പനിക്ക് ചികിത്സ തേടി.

ഈവര്‍ഷം മേയ് 31 വരെ (ബ്രാക്കറ്റില്‍ കഴിഞ്ഞവര്‍ഷത്തെ കണക്ക്)

പനി ബാധിച്ചവര്‍ – മരണം

ഡെങ്കി 846 (21,993) 3 (165)

എലിപ്പനി 225 (1408) 11 (80)

പകര്‍ച്ചപ്പനി 9.67 ലക്ഷം (35.27 ലക്ഷം) 23 (76) .

എച്ച്‌ 1 എന്‍ 1 11 (ലഭ്യമല്ല) 0 (ലഭ്യമല്ല)

മലേറിയ 251 (1177) 0 (2)

നിപയ്ക്ക് പിന്നാലെ കരിമ്ബനിയും

കുളത്തൂപ്പുഴ വില്ലുമര സ്വദേശിക്ക് കരിമ്ബനി(കാലാ അസര്‍) സ്ഥിരീകരിച്ചു. തിരുവനന്തപുരം മെഡിക്കല്‍ കോളേജില്‍ ചികിത്സയിലാണ്. ചികിത്സയും മരുന്നുമുള്ളതിനാല്‍ കരിമ്ബനിഭീതി വേണ്ടെന്ന് മെഡിക്കല്‍ കോളേജ് കമ്യൂണിറ്റി മെഡിസിന്‍ വിഭാഗം മേധാവി ഡോ. പി.എസ്. ഇന്ദു പറഞ്ഞു. കൊല്ലം, പാലക്കാട്, കണ്ണൂര്‍ ജില്ലകളില്‍ നേരത്തേയും രോഗം റിപ്പോര്‍ട്ട് ചെയ്തിട്ടുണ്ട്.

പ്രതിരോധപ്രവര്‍ത്തനങ്ങള്‍ക്കായി കൊല്ലം ജില്ലാ മെഡിക്കല്‍ ഓഫീസര്‍ക്ക് നിര്‍ദേശം നല്‍കിയതായി ആരോഗ്യമന്ത്രി കെ.കെ. ശൈലജ അറിയിച്ചു. വീടുകളില്‍ കരിമ്ബനിക്ക് കാരണക്കാരായ മണലീച്ചകളെ നശിപ്പിക്കാന്‍ പ്രത്യേക ലായനി തളിക്കും. ആരോഗ്യവകുപ്പിലെയും മെഡിക്കല്‍ കോളേജിലെയും ഡോക്ടര്‍മാരുടെ നേതൃത്വത്തില്‍ കരിമ്ബനിബാധിതപ്രദേശത്ത് മെഡിക്കല്‍ ക്യാമ്ബ് സംഘടിപ്പിക്കുമെന്നും അവര്‍ പറഞ്ഞു.

കരിമ്ബനി

* രോഗം പരത്തുന്നത്: മലയോരപ്രദേശങ്ങളില്‍ കാണുന്ന മണലീച്ചകള്‍ (സാന്‍ഡ് ഫ്‌ളൈ). ലീക്ഷ്‌മാനിയ ഡോണാവാണി എന്ന അണുവാണ് രോഗഹേതു.

* പകരുന്നത്: മനുഷ്യരില്‍നിന്ന് മനുഷ്യരിലേക്ക് പകരില്ല. കൊതുകിനെക്കാള്‍ വലുപ്പംകുറഞ്ഞ പെണ്‍ മണലീച്ചകള്‍ കടിക്കുന്നതിലൂടെ പകരുന്നു. രോഗമുള്ള ആളെ കടിക്കുന്നതിലൂടെ മണലീച്ചകള്‍ അണുവാഹകരാകുന്നു.

* ബാധിക്കുന്നത്: മജ്ജ, പ്ലീഹ, കരള്‍ എന്നിവയിലെ കോശങ്ങളെ. ശരിയായ ചികിത്സ ലഭിച്ചില്ലെങ്കില്‍ മരണസാധ്യത.

* രോഗലക്ഷണങ്ങള്‍: ഇടയ്ക്കിടെയുള്ള പനി. രോഗം മൂര്‍ച്ഛിക്കുന്നതോടെ വയര്‍, മുഖം, കൈകാലുകള്‍ എന്നിവിടങ്ങളിലെ തൊലിപ്പുറത്ത് കറുത്ത പാടുകള്‍ പ്രത്യക്ഷപ്പെടും. കരിമ്ബനി എന്ന പേരുവരാന്‍ ഇതാണ്‌ കാരണം. ഈച്ചകടിച്ച ഭാഗത്ത് വ്രണം ഉണ്ടാകാന്‍ സാധ്യത. ഭാരം കുറയും. ക്ഷീണമുണ്ടാകും. പ്ലീഹ, കരള്‍ എന്നിവയ്ക്ക് വീക്കം. രോഗപ്രതിരോധശേഷി തകരും. രോഗാണുക്കള്‍ ശരീരത്തിനുള്ളില്‍ പ്രവേശിച്ചാല്‍ പത്തുദിവസം വരെയെടുക്കും രോഗലക്ഷണങ്ങള്‍ പ്രകടിപ്പിക്കാന്‍. ചിലപ്പോള്‍ ഒരുവര്‍ഷംവരെ.

മുന്നൊരുക്കങ്ങളില്‍ വീഴ്ചയില്ല

ആരോഗ്യജാഗ്രതാ പദ്ധതിയുടെ ഭാഗമായി വിവിധ വകുപ്പുകള്‍ ചേര്‍ന്ന് മുന്നൊരുക്കങ്ങളും മാലിന്യനിര്‍മാര്‍ജനപ്രവര്‍ത്തനങ്ങളും നിശ്ചയിച്ച പ്രകാരം നടത്തുന്നുണ്ട്. 100 ശതമാനം നടന്നുവെന്ന് പറയുന്നില്ല. കൊതുകുനിവാരണ പ്രവര്‍ത്തനങ്ങള്‍ ഊര്‍ജിതമാക്കാന്‍ ജനങ്ങള്‍ കൂടുതല്‍ ശ്രദ്ധിക്കണം. മഴക്കാല രോഗങ്ങളും വിവിധയിനം പനികളും നേരിടാനുള്ള എല്ലാ തയ്യാറെടുപ്പുകളും ആരോഗ്യവകുപ്പ് നടത്തിയിട്ടുണ്ട്.

-ഡോ. ആര്‍.എല്‍. സരിത,

ആരോഗ്യവകുപ്പ് ഡയറക്ടര്‍

കൂടുതല്‍ പ്രതിരോധം ആവശ്യം

രോഗികളുടെ എണ്ണം കുറഞ്ഞാലും ഏതുതരം ഡെങ്കിയാണ് വരുന്നതെന്നത് പ്രധാനമാണ്. സങ്കീര്‍ണത ഏറെയുള്ള ഡെങ്കിപ്പനിയാണ് ഇനി പ്രതീക്ഷിക്കുന്നത്. അതിനാല്‍ത്തന്നെ കൂടുതല്‍ പ്രതിരോധം ആവശ്യമാണ്. മഴയും വെയിലും മാറിമാറി വരുന്ന കാലാവസ്ഥയില്‍ പ്രത്യേകശ്രദ്ധ വേണം. കൊതുക് പെരുകാന്‍ അനുകൂല സാഹചര്യമാണത്.

-ഡോ. പി.എസ്. ഇന്ദു,

മെഡിക്കല്‍ കോളേജ് കമ്യൂണിറ്റി മെഡിസിന്‍ മേധാവി

തിരുവനന്തപുരം (www.mediavisionnews.in):വിമാനങ്ങളിലേതിനു സമാനമായി അധിക ലഗേജിന് ചാര്‍ജ് ഈടാക്കാനൊരുങ്ങി ഇന്ത്യന്‍ റെയില്‍വെ. അധികമായി വരുന്ന ലഗേജിന് ഇനി മുതല്‍ ചാര്‍ജും പിഴയും കൊടുക്കേണ്ടിവരും. പുതിയ പരിഷ്‌കാരം ഈ മാസം ആരംഭിക്കാനാണ് റെയില്‍വെയുടെ നീക്കം.

നിയമപ്രകാരം ഒരോ യാത്രികനും ട്രെയിനില്‍ കൊണ്ടു പോകാവുന്ന ലഗേജിന് നിശ്ചിത അളവുണ്ട്. എന്നാല്‍ പലയാത്രക്കാരും ഇത് പാലിക്കാതെ വരികയും മറ്റ് യാത്രക്കാര്‍ക്ക് അസൗകര്യം സൃഷ്ടിക്കുകയും ചെയ്യുന്നു എന്ന പരാതികളുടെ അടിസ്ഥാനത്തിലാണ് റെയില്‍വെയുടെ പുതിയ നീക്കം.

അനുവദിച്ചതിലും അധിക ലഗേജുമായി യാത്ര ചെയ്താല്‍ ആറിരട്ടിവരെ പിഴ ഈടാക്കാനാണ് നീക്കം നടത്തുന്നത്. അനുവദനീയമായതിലും അധിക ലഗേജ് ഉണ്ടെങ്കില്‍ അത് മുന്‍കൂട്ടി ബുക്ക് ചെയ്യേണ്ടിവരും.

നിയമ പ്രകാരം ഫസ്റ്റ് ക്ലാസ് ഏസി കോച്ചില്‍ യാത്രക്കാരന് സൗജന്യമായി കൊണ്ടു പോകാവുന്ന ലഗേജിന്റെ ഭാരം 70 കിലോയും പരമാവധി 150 കിലോയുമാണ്. സെക്കന്റ് ക്ലാസ് ഏസി യാത്രക്കാരന് 50 കിലോയും പരമാവധി 100 കിലോയുമാണ് അനുവധിക്കപ്പെട്ടിട്ടുള്ളത്. സ്ലീപ്പര്‍ ക്ലാസിലെയും സെക്കന്റ് ക്ലാസിലെയും യാത്രക്കാരന് 40 കിലോയും 35 കിലോയുമാണ് അനുവദിക്കപ്പെട്ടിട്ടുള്ളത്. ഇവര്‍ക്ക് പരമാവധി കൊണ്ടു പോകാന്‍ പറ്റുന്ന ഭാരം യഥാക്രമം 80കിലോയും 70 കിലോയുമാണ്.

തിരുവനന്തപുരം (www.mediavisionnews.in): സിനിമാ താരങ്ങള്‍ കേരളത്തില്‍ സജീവ രാഷ്ട്രീയത്തില്‍ ഇടപെടുന്നത് ഇന്ന് പുതുമയുള്ള കാര്യമല്ല. താരസംഘടനയായ അമ്മയുടെ അധ്യക്ഷനായ ഇന്നസെന്റ് ലോക്‌സഭയിലേക്ക് മത്സരിച്ചു വിജയിച്ച വ്യക്തിയാണ്. കെ ബി ഗണേശ് കുമാര്‍ ആകട്ടെ മന്ത്രിയായും എംഎല്‍എയായും ശോഭിച്ചു. ഇതിനൊക്കെ പിന്നാലെ സുരേഷ് ഗോപി രാജ്യസഭാ എംപിയാകുകയും ചെയ്തു. ഇപ്പോഴിതാ കേരളത്തില്‍ രാജ്യസഭാ സീറ്റിലേക്ക് ഒഴിവു വന്ന സാഹചര്യത്തില്‍ മെഗാ സ്റ്റാര്‍ മമ്മൂട്ടിയുടെ പേരും സജീവമായി ചര്‍ച്ചയാകുന്നു.

മുന്‍ മന്ത്രി ബിനോയ് വിശ്വം സിപിഐയുടെ രാജ്യസഭാ സ്ഥാനാര്‍ത്ഥിയായി ഇന്നലെ തിരുവനന്തപുരത്തു ചേര്‍ന്ന സംസ്ഥാന എക്സിക്യൂട്ടീവ് യോഗം തീരുമാനിച്ചിരുന്നു. ഇതിന് പിന്നാലെയാണ് സിപിഎമ്മിന്റെ സീറ്റില്‍ ആര്‍ക്കാണ് നറുക്കു വീഴുക എന്ന ചര്‍ച്ച ഉയര്‍ന്നത്. ഈ ചര്‍ച്ചകളുടെ കൂട്ടത്തിലാണ് മെഗസ്സ്്റ്റാര്‍ മമ്മൂട്ടിയുടെ പേര് ഉയര്‍ന്നു കേട്ടത്. കാലങ്ങളായി സിപിഎം സഹയാത്രികനാണ് മെഗാ സ്റ്റാര്‍ മമ്മൂട്ടി. അതുകൊണ്ട് തന്നെ അദ്ദേഹത്തെ രാജ്യസഭയിലേക്ക് അയക്കുന്നതില്‍ സിപിഎമ്മിന് താല്‍പ്പര്യമുണ്ട്. മുഖ്യമന്ത്രി പിണറായി വിജയനാണ് ഇക്കാര്യത്തില്‍ വലിയ താല്‍പ്പര്യമുള്ളത്.

മമ്മൂട്ടിയെ രാജ്യസഭയിലേക്ക് അയച്ചാല്‍ അത് രാഷ്ട്രീയമായും ഏറെ ഗുണകരമാകുമെന്നാണ് സിപിഎം കണക്കു കൂട്ടല്‍. എന്നാല്‍, സിനിമയുടെ തിരക്കില്‍ നില്‍ക്കുന്ന മമ്മൂട്ടിയെ രാജ്യസഭയിലേക്ക് അയക്കണോ എന്ന ചോദ്യവും ഇതോടെ ഉയരുന്നുണ്ട്. അതിനിടെ കെ.ടി.ഡി.സി. മുന്‍ ചെയര്‍മാന്‍ ചെറിയാന്‍ ഫിലിപ്പിന്റെ പേരും ആലോചനയിലുണ്ട്. എന്നാല്‍, ലോക്സഭാ തെരഞ്ഞെടുപ്പു പ്രചാരണത്തില്‍ ബിജെപിയുടെ സുരേഷ് ഗോപിയിലും മുന്തിയ താരത്തിളക്കമെന്ന സ്ഥാനമാണു മമ്മൂട്ടിക്കു മുന്‍തൂക്കം നല്‍കുന്നത്. രാജ്യസഭയിലെ നാമനിര്‍ദ്ദേശം ചെയ്യപ്പെട്ട അംഗമാണു സുരേഷ് ഗോപി.

ചാലക്കുടിയില്‍നിന്ന് ഇടതുസ്വതന്ത്രനായി ലോക്സഭയിലെത്തിയ ഇന്നസെന്റ് ഇനി മത്സരിക്കാന്‍ സാധ്യത കുറവാണെന്നതും മമ്മൂട്ടിക്ക് അനുകൂലമാണ്. അതുകൊണ്ടു തന്നെ സിനിമാക്കാരുടെ പ്രതിനിധി എന്ന നിലയിലും മമ്മൂട്ടി രാജ്യസഭയില്‍ എത്തിയേക്കും. മുഖ്യമന്ത്രി പിണറായി വിജയനുമായും സിപിഎം. നേതൃത്വവുമായും അടുത്ത ബന്ധമുള്ള മമ്മൂട്ടി മുമ്ബേ സിപിഎം. സഹയാത്രികനാണ്. സിപിഎമ്മിന്റെ ടിവി ചാനലായ കൈരളിയുടെ മാതൃകമ്ബനിയായ മലയാളം കമ്യൂണിക്കേഷന്‍സിന്റെ ചെയര്‍മാനുമാണ്. ഡിവൈഎഫ്‌ഐയുടെയും മറ്റും വേദികളിലെത്തി രാഷ്ട്രീയ ആഭിമുഖ്യം പരസ്യമാക്കിയിട്ടുമുണ്ട്. അതേസമയം സിനിമാ തിരക്കിലുള്ള നടന് രാജ്യസഭയില്‍ എങ്ങനെ ശോഭിക്കാനാകുമെന്ന ചോദ്യവും ഉയരുന്നുണ്ട്.

പാര്‍ലമെന്റില്‍ സിപിഎമ്മിന്റെ അംഗബലം പരിമിതമായ നിലയ്ക്ക് രാജ്യസഭയിലേക്കു സജീവ രാഷ്ട്രീയക്കാര്‍ മതിയെന്നു കേന്ദ്രനേതൃത്വം നിര്‍ദേശിച്ചാല്‍ മാത്രമേ മമ്മൂട്ടിയുടെ സാധ്യത അടയുകയുള്ളൂ. പോളിറ്റ് ബ്യൂറോ അംഗം എം എ ബേബിക്കും രാജ്യസഭാ സ്ഥാനാര്‍ത്ഥിത്വത്തിന് സാധ്യതയുണ്ട്. യെച്ചൂരിയുടെ രാജ്യസഭാ കാലാവധി അവസാനിച്ച സാഹചര്യത്തില്‍ പാര്‍ട്ടിക്ക് വേണ്ടി ശബ്ദിക്കുന്ന മുതിര്‍ന്ന നേതാവിനെ രാജ്യസഭയിലേക്ക് അയക്കുന്നതു നല്ലതാണെന്നാണ് കേന്ദ്ര നേതൃത്വത്തിന്റെ താല്‍പ്പര്യം. അങ്ങനെയെങ്കില്‍ എം എ ബേബിക്ക് നറുക്ക് വീഴാനും സാധ്യത കൂടുതലാണ്. വെള്ളിയാഴ്ച ചേരുന്ന യോഗത്തിലാകും സിപിഎമ്മിന്റെ സ്ഥാനാര്‍ത്ഥി നിര്‍ണയം.

കേരളത്തില്‍ നിന്നുള്ള മൂന്നു രാജ്യസഭാംഗങ്ങളുടെ കാലാവധിയാണ് അവസാനിക്കുന്നത്. തെരഞ്ഞെടുപ്പില്‍ രണ്ടെണ്ണത്തില്‍ വിജയം നേടാനുള്ള അംഗബലം നിയമസഭയില്‍ എല്‍.ഡി.എഫിനുണ്ട്. അവ സിപിഎമ്മും സിപിഐയും പങ്കിടും. കോണ്‍ഗ്രസ് സ്ഥാനാര്‍ത്ഥി നിര്‍ണയം തര്‍ക്കത്തിലാണ്. 21 നാണു തെരഞ്ഞെടുപ്പ്. കോണ്‍ഗ്രസിന്റെ രാജ്യസഭാ സ്ഥാനാര്‍ത്ഥി ആരാകുമെന്ന ചോദ്യവും ഉയരുന്നുണ്ട്. പിജെ കുര്യനെതിരെ എതിര്‍പ്പുണ്ടെങ്കിലും അദ്ദേഹത്തിനു തന്നെയാണ് കൂടുതല്‍ സാധ്യത.