കർണാടക മുൻ രഞ്ജി ട്രോഫി താരവും മികച്ച ബൗളറുമായ എസ്.എൽ. അക്ഷയ് (39) മൈതാനത്ത് വെച്ചുണ്ടായ ഹൃദയാഘാതത്തെ തുടർന്ന് അന്തരിച്ചു. ബെംഗളൂരുവിലെ കെ.ആർ. പുരത്ത് നടന്ന മൂന്നാം ഡിവിഷൻ ക്രിക്കറ്റ് മത്സരത്തിനിടെ ഫീൽഡ് ചെയ്യുന്നതിനിടയിലാണ് അക്ഷയ്ക്ക് പെട്ടെന്ന് നെഞ്ചുവേദന അനുഭവപ്പെട്ടത്. ഉടൻ തന്നെ അദ്ദേഹത്തെ ആശുപത്രിയിൽ എത്തിക്കാൻ ശ്രമിച്ചെങ്കിലും ജീവൻ രക്ഷിക്കാനായില്ല.
കർണാടക സ്റ്റേറ്റ് ടീമിനായി രഞ്ജി ട്രോഫി കളിച്ചിട്ടുള്ള അക്ഷയ്, കർണാടക പ്രീമിയർ ലീഗിലെ സജീവ സാന്നിധ്യവുമായിരുന്നു. ഫസ്റ്റ് ക്ലാസ് ക്രിക്കറ്റിലെ മികച്ച പ്രകടനങ്ങൾക്കപ്പുറം, ജൂനിയർ പരിശീലകൻ എന്ന നിലയിൽ യുവതാരങ്ങളെ വളർത്തുന്നതിലും അദ്ദേഹം വലിയ പങ്ക് വഹിച്ചിരുന്നു. അക്ഷയുടെ അപ്രതീക്ഷിത വിയോഗത്തിൽ കർണാടക സ്റ്റേറ്റ് ക്രിക്കറ്റ് അസോസിയേഷൻ അഗാധമായ ദുഃഖം രേഖപ്പെടുത്തി. കായികരംഗത്തെ അനേകം പേരാണ് താരത്തിന് ആദരാഞ്ജലികൾ അർപ്പിക്കുന്നത്.