കുമ്പള: ഓട്ടോയില്‍ കടത്തിയ 2.44 ഗ്രാം എം.ഡി.എം.എ മയക്കുമരുന്നുമായി ഒരു യുവാവിനെയും കൈവശം വെച്ച 25 ഗ്രാം കഞ്ചാവുമായി മറ്റൊരു യുവാവിനെയും കുമ്പള എക്‌സൈസ് സംഘം അറസ്റ്റ് ചെയ്തു. കൈയ്യാര്‍ സ്വദേശികളായ വിഷ്ണു കുമാര്‍ (33), സന്തോഷ് (26) എന്നിവരാണ് അറസ്റ്റിലായത്. എം.ഡി.എം.എ മയക്കുമരുന്ന് കൈമാറാനായി ഓട്ടോയില്‍ കൊണ്ടു പോകുന്നതിനിടെയാണ് ധര്‍മ്മത്തടുക്കയില്‍ വെച്ച് വിഷ്ണു കുമാറിനെ എക്‌സൈസ് സംഘം പിടികൂടിയത്. 25 ഗ്രാം കഞ്ചാവ് കൈവശം വെച്ചതിനാണ് സന്തോഷിനെ പിടിച്ചത്. കുമ്പള എക്‌സൈസ് ഇന്‍സ്‌പെക്ടര്‍ ഇന്‍ചാര്‍ജ് വി.വി. പ്രസന്ന കുമാര്‍, പ്രിവന്റീവ് ഓഫീസര്‍മാരായ സുധീന്ദ്രന്‍, അനീഷ് കുമാര്‍, രാജീവന്‍, സിവില്‍ എക്‌സൈസ് ഓഫീസര്‍മാരായ സിജു, രാഹുല്‍ എന്നിവര്‍ പരിശോധക സംഘത്തിലുണ്ടായിരുന്നു.