മൂന്ന് വര്‍ഷത്തിനുശേഷം സെഞ്ചുറി, പോണ്ടിങ്ങിന്റെയും ജയസൂര്യയുടെയും റെക്കോഡിനൊപ്പം രോഹിത്

മധ്യപ്രദേശിലെ ഹോള്‍ക്കര്‍ സ്‌റ്റേഡിയത്തില്‍ നടന്ന മത്സരത്തില്‍ 85 പന്തുകളില്‍ നിന്ന് ഒന്‍പത് ഫോറിന്റെയും ആറ് സിക്‌സിന്റെയും സഹായത്തോടെ 101 റണ്‍സെടുത്താണ് രോഹിത് പുറത്തായത്. 509 ദിവസത്തെ കാത്തിരിപ്പിനുശേഷമാണ് രോഹിത് അന്താരാഷ്ട്ര ക്രിക്കറ്റില്‍ വീണ്ടും സെഞ്ചുറി നേടിയത്. 2021 സെപ്റ്റംബറില്‍ ഇംഗ്ലണ്ടിനെതിരായ ടെസ്റ്റിലാണ് രോഹിത് അവസാനമായി മൂന്നക്കം കണ്ടത്. പിന്നീട് എല്ലാ ഫോര്‍മാറ്റിലുമായി 53 ഇന്നിങ്‌സുകള്‍ കളിച്ചെങ്കിലും 12 അര്‍ധസെഞ്ചുറി മാത്രമാണ് നേടാനായത്.

രോഹിത്തിന്റെ ഏകദിനത്തിലെ 30-ാം സെഞ്ചുറിയാണിത്. ഇതോടെ ഇന്ത്യന്‍ നായകന്‍ ഓസ്‌ട്രേലിയന്‍ ഇതിഹാസം റിക്കി പോണ്ടിങ്ങിന്റെ റെക്കോഡിനൊപ്പമെത്തി. ഏകദിനത്തില്‍ ഏറ്റവുമധികം സെഞ്ചുറി നേടുന്ന മൂന്നാമത്തെ താരം എന്ന റെക്കോഡാണ് രോഹിത് നേടിയത്. പോണ്ടിങ്ങിനും 30 സെഞ്ചുറിയാണുള്ളത്.