എല്ലാ ഐ ഫോൺ ആരാധകരുടെ കണ്ണും കാതും ഇപ്പോൾ അമേരിക്കയിലെ കലിഫോർണിയയിലെ ആപ്പിളിന്റെ ആസ്ഥാനത്തേക്കാണ്. സെപ്റ്റംബർ 14 ന് പുറത്തിറങ്ങുന്ന ഐ ഫോണിന്റെ പുതിയ അവതാരമായ ഐ ഫോൺ 13 ന് വേണ്ടി കാത്തിരിക്കുകയാണ് നമ്മൾ.
ഐ ഫോൺ പതിമൂന്നാമൻ ഇറങ്ങുന്നതിന് രണ്ട് ദിവസങ്ങൾക്ക് മുമ്പ് ഇതാ ഐ ഫോൺ 12 ന് വലിയ ഡിസ്‌കൗണ്ടുകൾ പ്രഖ്യാപിച്ചിരിക്കുകയാണ് ഇന്ത്യൻ ഇ-കൊമേഴ്‌സ് ഭീമനായ ഫ്‌ളിപ്പ്കാർട്ട്. 79,900 രൂപയ്ക്ക് ആപ്പിൾ പുറത്തിറക്കിയ 64 ജിബി ശേഷിയുള്ള ഐ ഫോൺ ഫ്ളിപ്പ് കാർട്ട് ഇപ്പോൾ വിൽക്കുന്നത് 66,999 രൂപയ്ക്കാണ്. ആപ്പിളിന്റെ ഔദ്യോഗിക വെബ്‌സൈറ്റിൽ ഫോണിന് ഇപ്പോഴും 79,900 രൂപ തന്നെയാണ് വില. എന്നുവച്ചാൽ 12,901 രൂപയുടെ വിലക്കിഴിവാണ് ഫ്‌ളിപ്പ്കാർട്ട് നൽകുന്നത്.