രണ്ട്​ ഡോസുമെടുത്ത ഇന്ത്യൻ സഞ്ചാരികൾക്ക്​ വാതിൽ തുറന്ന്​ കൂടുതൽ രാജ്യങ്ങൾ; കോവാക്​സിൻ എടുത്തവർക്കും പ്രവേശനം

0
324

കോവിഡ്​ വാക്​സിൻ രണ്ട്​ ഡോസുമെടുത്ത ഇന്ത്യൻ സഞ്ചാരികൾക്കായി​ കൂടുതൽ രാജ്യങ്ങൾ അതിർത്തി തുറക്കുന്നു​. ശ്രീലങ്കയാണ്​ ഈ പട്ടികയിൽ അവസാനം ഇടംപിടിച്ച രാജ്യങ്ങളിലൊന്ന്​. കോവിഷീൽഡ്​, കോവാക്​സിൻ എന്നീ രണ്ട്​ വാക്​സിനുകളെയും ശ്രീലങ്ക അംഗീകരിക്കുന്നുണ്ട്​ എന്നതാണ്​ മറ്റൊരു പ്രത്യേകത. അധികരാജ്യങ്ങളും കോവിഷീൽഡ്​ മാത്രമാണ്​ അംഗീകരിക്കുന്നത്​.

ഒരു ഡോസ് മാത്രം​ എടുത്തവർക്കോ വാക്​സിൻ തീരെ എടുക്കാത്തവർക്കോ ​ശ്രീലങ്കയിലേക്ക്​ പ്രവേശിക്കാൻ കഴിയില്ല. അതേസമയം, ഒരു ഡോസ്​ വാക്​സിൻ എടുക്കുകയും പിന്നീട്​ കോവിഡ്​ വന്ന്​ ഭേദമാവുകയും ചെയ്​തവർക്ക്​ ശ്രീലങ്കയിലേക്ക്​ വരാം. 28 മുതൽ 90 ദിവസത്തിനുള്ളിൽ കോവിഡ്​ ഭേദമായവർക്കാണ്​​ ഈ സൗകര്യം ഉപയോഗപ്പെടുത്താൻ കഴിയുക. ഇവർ ഇക്കാര്യം വ്യക്​തമാക്കുന്ന രേഖയും നൽകണം.

ആസ്ട്രാസെനെക്ക, ഫൈസർ ബയോൻടെക്, മോഡേണ, ജോൺസൺ ആൻഡ്​ ജോൺസൺ തുടങ്ങിയ വാക്​സിൻ എടുത്തവർക്ക്​ ഈ ആനുകൂല്യം ലഭിക്കും.

ശ്രീലങ്കയിലേക്ക്​ നേരിട്ട്​ പോകുന്നതിന്​ മുമ്പ്​ മുൻകൂട്ടി ടൂറിസ്റ്റ് വിസ എടുക്കേണ്ടതുണ്ട്​. eta.gov.lk എന്ന വെബ്​സൈറ്റ്​ വഴി വിസ ലഭിക്കും. വിസക്ക്​ അപേക്ഷിക്കുന്നതിന് മുമ്പ്, ശ്രീലങ്കയിലെ ആദ്യത്തെ രണ്ട്​ ദിവസം താമസിക്കാൻ ത്രീ സ്റ്റാറോ അതിന്​ മുകളിലോ ഉള്ള ഹോട്ടൽ റൂം ബുക്ക്​ ചെയ്യണം​. വിമാനത്താവളത്തിൽ ആർ.ടി.പി.സി.ആർ ടെസ്റ്റ്​ നടത്തി ഈ ഹോട്ടലിലേക്കാണ്​ പോകേണ്ടത്​. ഫലം നെഗറ്റീവായാൽ മാത്രമേ പുറത്തിറങ്ങാൻ സാധിക്കൂ.

യാത്രക്കാർ കോവിഡ് -19 ലോക്കൽ ട്രാവൽ ഇൻഷുറൻസിനും ആർ.ടി.പി.സി.ആർ ടെസ്റ്റിനും പണം നൽകണം. രണ്ട്​ വയസ്സിന്​ താഴെയുള്ള കുട്ടികൾക്ക്​ ​പരിശോധന ഉണ്ടാകില്ല. അതേസമയം, രക്ഷിതാക്കൾക്ക്​ കോവിഡ്​ ലക്ഷണമുണ്ടെങ്കിൽ ഇവരെയും പരിശോധിക്കും.

ശ്രീലങ്കയെ കൂടാതെ ഒമാൻ, സ്വിറ്റ്​സർലാൻഡ്​, ഫ്രാൻസ്​, സ്​പെയ്​ൻ തുടങ്ങിയ രാജ്യങ്ങളും രണ്ട്​ വാക്​സിൻ എടുത്ത ഇന്ത്യൻ സഞ്ചാരികൾക്ക്​ നേരിട്ട്​​ പ്രവേശനം അനുവദിക്കുന്നുണ്ട്​. എന്നാൽ, ഈ രാജ്യങ്ങൾ കോവിഷീൽഡ്​ മാത്രമേ അംഗീകരിച്ചിട്ടുള്ളൂ.

LEAVE A REPLY

Please enter your comment!
Please enter your name here