ഉപ്പള: കാറില്‍ എം.ഡി.എം.എ മയക്കുമരുന്ന് കടത്തുന്നതിനിടെയുണ്ടായ മല്‍പ്പിടിത്തത്തിനിടയില്‍ പ്രതി പൊലീസിനെ വെട്ടിച്ച് രക്ഷപ്പെട്ടു. 11 ഗ്രാം എം.ഡി.എം.എ മയക്കുമരുന്നും സ്വിഫ്റ്റ് കാറും മഞ്ചേശ്വരം പൊലീസ് കസ്റ്റഡിയിലെടുത്തു. രക്ഷപ്പെട്ട മണിമുണ്ടയിലെ സമീറിനെതിരെ പൊലീസ് കേസെടുത്തിട്ടുണ്ട്.
ഇന്നലെ രാത്രി മഞ്ചേശ്വരം എസ്.ഐ എ. ബാലേന്ദ്രനും ഡ്രൈവറും ഉപ്പള ടൗണില്‍ വാഹന പരിശോധന നടത്തുന്നതിനിടെയാണ് അതുവഴി സ്വിഫ്റ്റ് കാര്‍ വന്നത്. കൈകാട്ടി കാര്‍ നിര്‍ത്താനും സമീറിനോട് കാറില്‍ നിന്നിറങ്ങാനും ആവശ്യപ്പെട്ടു. എന്നാല്‍ കാറില്‍ നിന്നിറങ്ങി ഓടാന്‍ ശ്രമിക്കുന്നതിനിടെ പൊലീസും പ്രതിയും തമ്മില്‍ മല്‍പ്പിടിത്തമുണ്ടായി. അതിനിടെയാണ് എസ്.ഐയേയും ഡ്രൈവറേയും തള്ളിമാറ്റി സമീര്‍ ഓടി രക്ഷപ്പെട്ടത്. പൊലീസ് പിന്തുടര്‍ന്നെങ്കിലും പിടിക്കാനായില്ല.
മല്‍പിടിത്തത്തിനിടയില്‍ പ്രതിയുടെ കീശയിലുണ്ടായിരുന്ന തിരിച്ചറിയല്‍ കാര്‍ഡ് വീണതാണ് ആളെ തിരിച്ചറിയാന്‍ സഹായകമായത്. പ്രതിയെ കണ്ടെത്താന്‍ അന്വേഷണം ഊര്‍ജിതമാക്കി.