ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം കുത്തനെ ഉയരുന്നു. വേൾഡോമീറ്ററിന്റെ കണക്കനുസരിച്ച് ആകെ രോഗം ബാധിച്ചവരുടെ എണ്ണം 11,949,280 ആയി. മരണസംഖ്യ 546,601 ആയി ഉയർന്നു. 6,849,545 പേരാണ് ഇതുവരെ രോഗമുക്തി നേടിയത്.
അമേരിക്കയിൽ സ്ഥിതി ഗുരുതരമായി തുടരുകയാണ്. അരലക്ഷത്തോളം പേർക്കാണ് പുതുതായി കൊവിഡ് സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം 30,95,700 ആയി ഉയർന്നു. യു.എസിൽ തൊള്ളായിരത്തിൽ കൂടുതലാളുകളാണ് ഇന്നലെ മാത്രം മരിച്ചത്.
ബ്രസീലിൽ നാൽപതിനായിരത്തിൽ കൂടുതലാളുകൾക്കാണ് പുതുതായി കൊവിഡ് സ്ഥിരീകരിച്ചത്. പ്രസിഡന്റ് ജൈര്‍ ബോല്‍സൊനാരോയ്ക്ക് വൈറസ് ബാധ സ്ഥിരീകരിച്ചു. ഒരു മാദ്ധ്യമത്തിന് നൽകിയ അഭിമുഖത്തിലാണ് അദ്ദേഹം ഇക്കാര്യം അറിയിച്ചത്. ചികിത്സയുടെ ഭാഗമായി ഹൈഡ്രോക്‌സി ക്ലോറോക്വിന്‍ ഉപയോഗിക്കുന്നുണ്ടെന്നും പ്രസിഡന്റ് വ്യക്തമാക്കി.
ഇന്ത്യയിൽ കൊവിഡ് ബാധിതരുടെ എണ്ണത്തിൽ വൻ വർദ്ധനവാണുണ്ടാകുന്നത്.743,481 പേർക്കാണ് രാജ്യത്ത് വൈറസ് ബാധ സ്ഥിരീകരിച്ചത്. മരണസംഖ്യ ഇരുപതിനായിരം കടന്നു. രോഗമുക്തി നേടിയവരുടെ എണ്ണം 457,058ആയി. രോഗം ഭേദമാകുന്നവരുടെ എണ്ണത്തിലെ വർദ്ധനവ് ആശ്വാസം നൽകുന്നതായി ആരോഗ്യമന്ത്രാലയം വ്യക്തമാക്കി.