വാട്സ്ആപ്പ് അക്കൗണ്ട് ഇല്ലാത്തവരുമായും സന്ദേശങ്ങൾ കൈമാറാൻ സഹായിക്കുന്ന പുതിയ ‘ഗസ്റ്റ് ചാറ്റ്’ ഫീച്ചർ കമ്പനി പരീക്ഷണാടിസ്ഥാനത്തിൽ അവതരിപ്പിച്ചു. ആപ്പ് ഇൻസ്റ്റാൾ ചെയ്യാത്തവർക്കും വെബ് ബ്രൗസർ വഴി ആശയവിനിമയം നടത്താൻ സാധിക്കുന്നതാണ് ഈ പുതിയ സംവിധാനം. നിലവിൽ ആൻഡ്രോയിഡ്, ഐഒഎസ്, വെബ് പതിപ്പുകളിൽ പരിമിതമായ ഉപയോക്താക്കൾക്ക് മാത്രമാണ് ഈ സൗകര്യം ലഭ്യമാക്കിയിട്ടുള്ളത്. ഉപയോക്താവ് അയക്കുന്ന ഒരു ഇൻവൈറ്റ് ലിങ്ക് വഴി മറ്റൊരാൾക്ക് നേരിട്ട് ചാറ്റിൽ പ്രവേശിക്കാൻ കഴിയുമെന്നതാണ് ഇതിന്റെ പ്രത്യേകത.
ഈ ഫീച്ചർ ഉപയോഗിക്കാൻ ‘ഇൻവൈറ്റ് എ ഫ്രണ്ട്’ ഓപ്ഷൻ വഴിയോ കോൺടാക്റ്റ് ലിസ്റ്റിന് സമീപമുള്ള ഗസ്റ്റ് ഓപ്ഷൻ വഴിയോ ലിങ്ക് സൃഷ്ടിക്കാവുന്നതാണ്. ലിങ്ക് ലഭിക്കുന്ന വ്യക്തിക്ക് സ്വന്തം പേര് നൽകി ഉടൻ തന്നെ സന്ദേശങ്ങൾ അയച്ചു തുടങ്ങാം. രജിസ്റ്റർ ചെയ്ത അക്കൗണ്ടല്ലെന്ന് തിരിച്ചറിയാൻ ഇത്തരത്തിലുള്ള സംഭാഷണങ്ങൾക്ക് ‘ഗസ്റ്റ്’ എന്ന ലേബൽ നൽകും. സുരക്ഷയുടെ ഭാഗമായി ഗസ്റ്റ് ചാറ്റുകൾക്കും എന്ഡ്-ടു-എന്ഡ് എൻക്രിപ്ഷൻ ഉറപ്പാക്കുന്നുണ്ടെങ്കിലും, ലിങ്കുകൾ പങ്കുവെക്കുമ്പോൾ ജാഗ്രത പാലിക്കണമെന്ന് വിദഗ്ധർ നിർദ്ദേശിക്കുന്നു.
സാധാരണ ടെക്സ്റ്റ് സന്ദേശങ്ങൾ മാത്രമേ ഈ ഘട്ടത്തിൽ ഗസ്റ്റ് ചാറ്റ് വഴി അയക്കാൻ സാധിക്കൂ. ചിത്രങ്ങൾ, വീഡിയോകൾ, വോയിസ് നോട്ടുകൾ എന്നിവയ്ക്ക് നിലവിൽ പിന്തുണയില്ല. കൂടാതെ, ഈ ചാറ്റുകൾ 10 ദിവസത്തിന് ശേഷം താനേ കാലഹരണപ്പെടും എന്ന പരിമിതിയുമുണ്ട്. ആവശ്യമെങ്കിൽ ഗസ്റ്റ് ഉപയോക്താക്കളെ ബ്ലോക്ക് ചെയ്യാനുള്ള നിയന്ത്രണവും വാട്സ്ആപ്പ് നൽകുന്നുണ്ട്. ഫീച്ചർ ഇപ്പോൾ പരീക്ഷണ ഘട്ടത്തിലായതിനാൽ വരും മാസങ്ങളിൽ കൂടുതൽ ഉപയോക്താക്കളിലേക്ക് ഇത് എത്തിച്ചേരുമെന്നാണ് പ്രതീക്ഷിക്കുന്നത്.