റിയാദ്: സഊദിയിൽ മാസപ്പിറവി ദൃശ്യമായില്ല. ചെറിയ പെരുന്നാൾ വെള്ളിയാഴ്ചയായിരിക്കും.
ശവ്വാൽ മാസപ്പിറവി ദൃശ്യമാകാത്തതിനെ തുടർന്ന് റമദാൻ 30 പൂർത്തിയാക്കിയാകും ഇത്തവണത്തെ പെരുന്നാൾ ആഘോഷമെന്ന് സഊദി പ്രഖ്യാപിച്ചു. ഇന്ന് വൈകുന്നേരം ചേർന്ന മാസപ്പിറവി ദർശന സമിതി യോഗമാണ് മാസപ്പിറവി സ്ഥിരീകരിക്കാത്തതിനെ തുടർന്ന് പ്രഖ്യാപനം നടത്തിയത്.
30 ദിവസത്തെ വ്രതാനുഷ്ഠാനത്തിന് ശേഷമാണ് ഹിജ്റ കലണ്ടറിലെ പത്താം മാസമായ ശവ്വാലിന് തുടക്കമാകുന്നത്. മാസപ്പിറവി നിരീക്ഷണത്തിലൂടെ പുതിയ മാസത്തിന്റെ ആരംഭം കുറിക്കുന്ന പാരമ്പര്യം അനുസരിച്ചാണ് തീരുമാനം.
നാല് ദിവസം അവധി
പെരുന്നാളിനോടനുബന്ധിച്ച് രാജ്യത്തെ സ്വകാര്യ മേഖലകയിലെ ജീവനക്കാർക്ക് നാല് ദിവസത്തെ അവധി നേരത്തെ പ്രഖ്യാപിച്ചിരുന്നു. ഇന്നത്ത (മാർച്ച് 18 ബുധനാഴ്ച) പ്രവൃത്തി സമയം അവസാനിക്കുന്നതോടെ അവധി ആരംഭിക്കും. സഊദി തൊഴിൽ നിയമത്തിലെ വ്യവസ്ഥകൾ പ്രകാരമാണ് മാനവ വിഭവശേഷി, സാമൂഹിക വികസന മന്ത്രാലയം അവധി പ്രഖ്യാപിച്ചത്.
പെരുന്നാൾ അവധിക്ക് മുന്നോടിയായി തൊഴിലുടമകൾക്കും ജീവനക്കാർക്കും വ്യക്തത നൽകുക എന്നതാണ് ഈ നേരത്തെയുള്ള പ്രഖ്യാപനത്തിന്റെ ലക്ഷ്യമെന്ന് മന്ത്രാലയ വക്താവ് മുഹമ്മദ് അൽ റുസൈഖി പറഞ്ഞു. തൊഴിലാളികളുടെ അവകാശങ്ങൾ സംരക്ഷിക്കുന്നതിനൊപ്പം അവശ്യ മേഖലകളിൽ തടസ്സമില്ലാത്ത പ്രവർത്തനം ഉറപ്പാക്കാൻ കമ്പനികളെ സഹായിക്കാനും ഇതിലൂടെ സാധിക്കുമെന്ന് അദ്ദേഹം കൂട്ടിച്ചേർത്തു.