പശ്ചിമേഷ്യയിൽ തുടരുന്ന സംഘർഷം ഇന്ത്യയുടെ വസ്ത്ര കയറ്റുമതി മേഖലയെ കടുത്ത പ്രതിസന്ധിയിലാക്കുന്നു. രാജ്യത്തെ പ്രധാന വസ്ത്ര നിർമ്മാണ കേന്ദ്രമായ സൂറത്തിൽ ഷിപ്പിംഗ് ചെലവ് 400 ശതമാനം വരെയാണ് വർധിച്ചത്. കയറ്റുമതി ചെയ്ത ഉൽപ്പന്നങ്ങൾ കപ്പലുകളിൽ കുടുങ്ങിക്കിടക്കുന്നതും വരുമാനം ലഭിക്കാൻ വൈകുന്നതും വ്യവസായികളെ ആശങ്കയിലാക്കുന്നു. യുദ്ധം ആരംഭിച്ച് ഒരാഴ്ച പിന്നിടുമ്പോൾ തന്നെ 300 മുതൽ 400 കോടി രൂപയുടെ വരുമാന നഷ്ടമാണ് ഈ മേഖലയിൽ കണക്കാക്കുന്നത്.
അസംസ്കൃത വസ്തുക്കളുടെ വിലക്കയറ്റമാണ് വ്യവസായം നേരിടുന്ന മറ്റൊരു പ്രധാന വെല്ലുവിളി. തുണിത്തരങ്ങളുടെ നിർമ്മാണത്തിന് ആവശ്യമായ മനുഷ്യനിർമ്മിത ഫൈബറുകൾക്ക് കിലോയ്ക്ക് 15 രൂപ വരെ വർധിച്ചു. ക്രൂഡ് ഓയിൽ വില ഉയരുന്നതും ഹോർമുസ് കടലിടുക്കിൽ നിയന്ത്രണങ്ങൾ വന്നതും സിന്തറ്റിക് നാരുകളുടെ നിർമ്മാണത്തെ ബാധിച്ചിട്ടുണ്ട്. ദക്ഷിണേന്ത്യയിലെ വസ്ത്ര നിർമ്മാണ തലസ്ഥാനമായ തിരുപ്പൂരിലും സ്ഥിതി സമാനമാണ്. പശ്ചിമേഷ്യൻ രാജ്യങ്ങളിലേക്ക് സീസൺ അനുസരിച്ചുള്ള വസ്ത്രങ്ങൾ കയറ്റുമതി ചെയ്യുന്ന തിരുപ്പൂരിലെ വ്യാപാരികൾ ഓർഡറുകൾ റദ്ദാക്കപ്പെടുമോ എന്ന ഭീതിയിലാണ്. അമേരിക്കൻ, യൂറോപ്പ് വിപണികളിലേക്കുള്ള ചരക്കുനീക്കവും പശ്ചിമേഷ്യ വഴിയായതിനാൽ കയറ്റുമതിയിൽ വലിയ കാലതാമസം നേരിടുന്നുണ്ട്. നിശ്ചിത സമയത്തിനുള്ളിൽ വസ്ത്രങ്ങൾ എത്തിച്ചില്ലെങ്കിൽ ഒരു വർഷത്തോളം വിപണി നഷ്ടപ്പെടുമെന്നതാണ് ഇവിടുത്തെ പ്രധാന ഭീഷണി.
ഷിപ്പിംഗിലെ കാലതാമസം മൂലം വിദേശ വാങ്ങലുകാർ ഓർഡറുകൾ റദ്ദാക്കുന്നത് ഒഴിവാക്കാൻ വ്യാപാരികൾ നിരന്തരം ആശയവിനിമയം നടത്തണമെന്ന് തിരുപ്പൂർ എക്സ്പോർട്ടേഴ്സ് അസോസിയേഷൻ നിർദ്ദേശിച്ചിട്ടുണ്ട്. നിലവിൽ വിപണി മന്ദഗതിയിലായിരിക്കുന്ന സാഹചര്യത്തിൽ യുദ്ധം കൂടി വന്നത് വസ്ത്രവ്യാപാര മേഖലയ്ക്ക് ഇരട്ടി പ്രഹരമാണ് നൽകുന്നത്. സൗദി അറേബ്യ, യുഎഇ തുടങ്ങിയ രാജ്യങ്ങളിലേക്കുള്ള കയറ്റുമതി തടസ്സപ്പെടുന്നത് ചെറുകിട വ്യാപാരികളെയും വൻതോതിൽ ബാധിച്ചിട്ടുണ്ട്.
വ്യോമാതിർത്തിയിലെ നിയന്ത്രണങ്ങളും വിമാന സർവീസുകളുടെ തടസ്സവും കാരണം കെട്ടിക്കിടക്കുന്ന ചരക്കുകൾക്ക് ‘ഡെമറേജ് ചാർജുകൾ’ ഒഴിവാക്കണമെന്ന് വസ്ത്ര കയറ്റുമതി പ്രമോഷൻ കൗൺസിൽ സർക്കാരിനോട് ആവശ്യപ്പെട്ടിട്ടുണ്ട്. ഇതുസംബന്ധിച്ച് കാർഗോ ടെർമിനൽ ഓപ്പറേറ്റർമാർക്ക് കർശന നിർദ്ദേശം നൽകാൻ ഡിജിസിഎ ഇടപെടണമെന്നും കൗൺസിൽ ആവശ്യപ്പെട്ടു. വരും ദിവസങ്ങളിൽ യുദ്ധം ശമിച്ചില്ലെങ്കിൽ ഇന്ത്യൻ തുണിത്തരങ്ങളുടെ ആഗോള വിപണിയിൽ വലിയ ഇടിവുണ്ടാകുമെന്നാണ് വിദഗ്ധർ വിലയിരുത്തുന്നത്.