ടെഹ്റാൻ: അസംസ്കൃത എണ്ണ വില ബാരലിന് 200 ഡോളർ വരെ ഉയരാമെന്ന ശക്തമായ മുന്നറിയിപ്പുമായി ഇറാൻ. ഇറാനെതിരെ യുഎസും ഇസ്രയേലും നടത്തുന്ന സംയുക്താക്രമണവും ഇറാന്റെ പ്രത്യാക്രമണങ്ങളും തുടരുന്നതിനിടെയാണ് മുന്നറിയിപ്പ്. ലോകത്തിലെ ഏറ്റവും പ്രധാനപ്പെട്ട എണ്ണ ഇടനാഴികളിലൊന്നായ ഹോർമുസ് കടലിടുക്കിലൂടെയുള്ള കപ്പൽ ഗതാഗതം കടുത്ത ഭീഷണി നേരിടുന്നത് ആഗോള ഊർജ വിപണിയെ ബാധിച്ച് തുടങ്ങിയിരിക്കുന്നതായാണ് റിപ്പോർട്ടുകൾ.
എണ്ണവിലയിൽ വലിയ വർധനവിനായി ലോകം തയ്യാറെടുക്കണമെന്ന് ഇറാൻ സൈനിക കമാൻഡ് പറഞ്ഞു. “എണ്ണ വില ബാരലിന് 200 ഡോളറായി ഉയരുന്നത് അഭിമുഖീകരിക്കാൻ തയ്യാറാകുക, കാരണം എണ്ണവില നിങ്ങൾ അസ്ഥിരമാക്കിയ പ്രാദേശികസുരക്ഷയെ ആശ്രയിച്ചിരിക്കുന്നു,” ഇറാൻ സൈനിക കമാൻഡിന്റെ വക്താവ് ഇബ്രാഹിം സൊൽഫഖാരി പറഞ്ഞു. ഇസ്രയേലിനും യുഎസിനുമെതിരെ പരിമിതമായ പ്രതികാരപരമായ ആക്രമണങ്ങളിൽ നിന്ന് നിരന്തരമായ ആക്രമണങ്ങളിലേക്ക് ഇറാൻ മാറുമെന്നും ഇബ്രാഹിം സൊൽഫഖാരി മുന്നറിയിപ്പ് നൽകി.
ഇസ്രയേലുമായുള്ള യുദ്ധവും യുഎസുമായുള്ള സംഘർഷവും ശക്തമായി തുടരുന്നതിനിടെയാണ് ഇറാൻ മുന്നറിയിപ്പ് നൽകിയത്. ലോകത്തിലെ എണ്ണയുടെ ഏകദേശം അഞ്ചിലൊന്നോളം വഹിക്കുന്ന ഹോർമുസ് കടലിടുക്കിലൂടെയുള്ള കപ്പൽ ഗതാഗതം മിസൈലുകൾ, ഡ്രോണുകൾ, നാവിക ആക്രമണങ്ങൾ എന്നിവ തടസ്സപ്പെടുത്തി. കടലിടുക്കിൽ കപ്പലുകൾക്ക് നേരെ ആക്രമണങ്ങൾ വർധിച്ചതോടെ ഫലത്തിൽ ഉപരോധത്തിലായിരിക്കുകയാണ്. ഏറ്റവും പുതിയ സംഭവവികാസങ്ങളിൽ, ഇറാൻ സേന ഹോർമുസ് കടലിടുക്കിൽ രണ്ട് കപ്പലുകളെ ആക്രമിച്ചതായി ഇറാനിയൻ സ്റ്റേറ്റ് അഫിലിയേറ്റഡ് ഫാർസ് ന്യൂസ് ഏജൻസി റിപ്പോർട്ട് ചെയ്ത ഇസ്ലാമിക് റെവല്യൂഷണറി ഗാർഡ് കോർ പ്രസ്താവനയിൽ അറിയിച്ചു.
അതേസമയം, പ്രൊജക്റ്റൈൽ ആക്രമണത്തിൽപ്പെട്ട തായ് കപ്പലിലെ 20 നാവികരെ രക്ഷപ്പെടുത്തിയതായി തായ്ലൻഡ് ഗതാഗത മന്ത്രാലയം അറിയിച്ചു. സുരക്ഷാ സാഹചര്യം വഷളായതിനെത്തുടർന്ന് ഷിപ്പിങ് കമ്പനികൾ കപ്പലുകൾ നിർത്തിവെക്കുകയോ വഴിതിരിച്ചുവിടുകയോ ചെയ്യാൻ തുടങ്ങി. കപ്പൽ ഇൻഷുറൻസുകാരും ഓപ്പറേറ്റർമാരും ഇടനാഴിയിലൂടെയുള്ള അപകടസാധ്യതകൾ പുനരാലോചിക്കുന്നതിനാൽ നൂറുകണക്കിന് ഓയിൽ ടാങ്കറുകൾ സമീപജലങ്ങളിൽ നങ്കൂരമിടാൻ നിർബന്ധിതരായി.
ഈ ആഴ്ച ആദ്യം എണ്ണവില ബാരലിന് 120 ഡോളറിന് മുകളിൽ ഉയർന്നുവെങ്കിലും പിന്നീട് അല്പം സ്ഥിരത കൈവരിക്കുകയും ഓഹരി വിപണികൾക്ക് ചില നഷ്ടങ്ങൾ വീണ്ടെടുക്കാനും കഴിഞ്ഞു. എന്നിരുന്നാലും, ഹോർമുസ് കടലിടുക്കിലെ ഏതെങ്കിലും നീണ്ടുനിൽക്കുന്ന തടസ്സം ആ ശാന്തതയെ വേഗത്തിൽ മാറ്റിമറിക്കുകയും ഒരു ഗുരുതരമായ വിതരണ പ്രതിസന്ധിക്ക് കാരണമാകുകയും ചെയ്യുമെന്ന് ഊർജ വിദഗ്ധർ മുന്നറിയിപ്പ് നൽകുന്നു.