ബംഗളൂരു: ഒരു മാമ്പഴത്തിന്റെ വിലമാത്രം 40,000 രൂപ വില, കിലോയ്ക്ക് രണ്ടര ലക്ഷം രൂപയും. ലോകത്തിലെ ഏറ്റവും വിലപിടിപ്പുള്ള മാമ്പഴമാണ് ഇപ്പോൾ കർണാടകയിലെ കൊപ്പാളിൽ താരം. ജപ്പാന്റെ സ്വന്തം മാമ്പഴമായ ‘മിയാസാകി’യാണ് ഈ വിലപിടിപ്പുള്ള മാമ്പഴം. ഹോർട്ടിക്കൾച്ചർ വകുപ്പ് കൊപ്പാളിലൊരുക്കിയ മാമ്പഴമേളയിലാണ് മിയാസാകിയും ഇടം പിടിച്ചിരിക്കുന്നത്.

ഡല്‍ഹി: പുതിയ പാർലമെന്‍റ് മന്ദിരത്തിന്‍റെ ഉദ്ഘാടനത്തോടനുബന്ധിച്ച് പ്രധാനമന്ത്രി നരേന്ദ്ര മോദി ഞായറാഴ്ച പ്രത്യേക സ്മരണിക തപാൽ സ്റ്റാമ്പും 75 രൂപ നാണയവും പുറത്തിറക്കി. പുതിയ മന്ദിരത്തിലെ ലോക്‌സഭാ ചേംബറിൽ നടന്ന ഉദ്ഘാടന ചടങ്ങിൽ മോദി നാണയവും സ്റ്റാമ്പും പ്രകാശനം ചെയ്തു.

35 ഗ്രാമാണ് നാണയത്തിന്‍റെ ഭാരം. അശോക സ്തംഭത്തിലെ സിംഹമാണ് നാണയത്തിന്‍റെ ഒരുവശത്ത് ആലേഖനം ചെയ്യുക. സത്യമേവ ജയതേ എന്ന വാചകം ഇതിന്‍റെ അടിയിലായി നല്‍കും. ദേവനാഗരി ലിപിയില്‍ എഴുതിയ ഭാരത് എന്ന വാക്ക് ഇടതുവശത്തും ഇംഗ്ലീഷില്‍ ഇന്ത്യ എന്ന് എഴുതിയിരിക്കുന്നത് വലതുവശത്തും നല്‍കും.

ഇന്ത്യയിലെ ലക്ഷക്കണക്കിന് പേര്‍ സഞ്ചരിക്കാനായി തെരെഞ്ഞെടുക്കുന്ന പൊതുഗതാഗതമാണ് ട്രെയിന്‍. കുറഞ്ഞ ചെലവില്‍ ദീര്‍ഘ ദൂര യാത്രക്ക് അവസരമൊരുക്കുന്നു എന്നതാണ് യാത്രക്കാരെ റെയില്‍വേയിലേക്ക് അടുപ്പിക്കുന്ന പ്രധാനപ്പെട്ട കാര്യം. അതില്‍ തന്നെ റിസര്‍വ്ഡ് കംപാര്‍ട്‌മെന്റുകളില്‍ ദീര്‍ഘദൂര യാത്ര ചെയ്യുന്നവരെ സംബന്ധിച്ച് ഏറ്റവും പ്രിയപ്പെട്ട സീറ്റാണ് ലോവര്‍ ബെര്‍ത്ത്, അല്ലെങ്കില്‍ സൈഡ് ലോവര്‍ ബെര്‍ത്ത് സീറ്റുകള്‍.എന്നാലിപ്പോള്‍ ട്രെയിനിലെ ലോവര്‍ ബെര്‍ത്ത് സീറ്റുകള്‍ ഇനി എല്ലാവര്‍ക്കും ലഭ്യമല്ല എന്നാണ് പുറത്ത് വരുന്ന റിപ്പോര്‍ട്ടുകള്‍. ഭിന്നശേഷി വിഭാഗക്കാര്‍ക്കായിരിക്കും ഇനി മുതല്‍ റെയില്‍വെയുടെ ലോവര്‍ ബെര്‍ത്ത് സീറ്റുകള്‍ ലഭ്യമാവുക. ഭിന്നശേഷിക്കാരുടെ യാത്രയെ കൂടുതല്‍ ആയാസരഹിതമാക്കുക എന്ന ഉദ്ധേശത്തിലാണ് ഇത്തരമൊരു പ്രധാനപ്പെട്ട തീരുമാനത്തിലേക്ക് റെയില്‍വെ എത്തിച്ചേര്‍ന്നത്.

റെയില്‍വെ ബോര്‍ഡിന്റെ പുതിയ ഉത്തരവ് പ്രകാരം സ്ലീപ്പര്‍ ക്ലാസില്‍ താഴെയും മദ്ധ്യ ഭാഗത്തുമുളള രണ്ട് സീറ്റുകള്‍, തേര്‍ഡ് എ.സി കംപാര്‍ട്‌മെന്റില്‍ രണ്ട് സീറ്റുകള്‍, എ.സി ത്രീ ചെയറില്‍ രണ്ട് സീറ്റുകള്‍ എന്നിങ്ങനെയാണ് ഭിന്നശേഷിക്കാര്‍ക്കായി റിസര്‍വ് ചെയ്തിരിക്കുന്നത്. ഭിന്നശേഷിക്കാരുടെ ഒപ്പം യാത്ര ചെയ്യുന്ന സഹായികള്‍ക്കും ഇത്തരം സീറ്റുകളില്‍ യാത്ര ചെയ്യാവുന്നതാണ്. ഗരീബ് രാത്ത് ട്രെയിനുകളില്‍ രണ്ട് ലോവര്‍ സീറ്റുകളും, രണ്ട് അപ്പര്‍ സീറ്റുകളുമാണ് ഭിന്നശേഷിക്കാരായ യാത്രക്കാര്‍ക്കായി റിസര്‍വ് ചെയ്യപ്പെട്ടിരിക്കുന്നത്.

അതേസമയം മുതിര്‍ന്ന പൗരന്‍മാര്‍ക്ക് ആവശ്യപ്പെടാതെ തന്നെ ലോവര്‍ ബെര്‍ത്ത് സീറ്റുകള്‍ ലഭിക്കുമെന്ന് റെയില്‍വെ അറിയിച്ചിട്ടുണ്ട്.സ്ലീപ്പര്‍ ക്ലാസില്‍ 6-7 ലോവര്‍ ബെര്‍ത്ത് സീറ്റുകള്‍, തേര്‍ഡ് എ.സി കംപാര്‍ട്‌മെന്റില്‍ 4-5 ലോവര്‍ ബെര്‍ത്ത് സീറ്റുകള്‍, സെക്കന്റ് എ.സി കംപാര്‍ട്‌മെന്റില്‍ 3-4 ലോവര്‍ ബെര്‍ത്ത് സീറ്റുകള്‍ എന്നിങ്ങനെയാണ് മുതിര്‍ന്ന പൗരന്‍മാര്‍ക്ക് ലഭിക്കുന്ന റിസര്‍വേഷന്‍.
അതിനൊപ്പം തന്നെ മുതിര്‍ന്ന പൗരന്‍മാര്‍ക്കും ഗര്‍ഭിണികള്‍ക്കും ബുക്ക് ചെയ്യുന്ന സമയത്ത് ഉയര്‍ന്ന ബെര്‍ത്തിലെ സീറ്റാണ് ലഭിച്ചതെങ്കില്‍, ടിക്കറ്റ് ചെക്ക് ചെയ്യുന്ന സമയത്ത് ടി.ടി.ക്ക് അത് ലോവര്‍ ബെര്‍ത്തിലാക്കി നല്‍കാനുളള അവകാശമുണ്ട്.

ന്യൂഡൽഹി: പുതിയ പാർലമെന്റ് മന്ദിരത്തിന്റെ ഉദ്ഘാടന ചടങ്ങിനോടനബന്ധിച്ച് നടന്ന സർവമത പ്രാർത്ഥനയിൽ (സർവ ധർമ്മ പ്രാർഥന) ഖുർആൻ പാരായണവും. ഖുർആനിലെ 55-ാം അധ്യായമായ സൂറത്തുർ റഹ്‌മാനിലെ ആദ്യ 27 ആയത്തുകളാണ് ചടങ്ങിൽ പാരായണം ചെയ്യപ്പെട്ടത്.

പാരായണം ചെയ്യപ്പെട്ട ഖുർആൻ സൂക്തകങ്ങളുടെ സാരാംശം ഇപ്രകാരം;

‘കരുണാമയനായ അല്ലാഹു ഈ ഖുർആൻ അഭ്യസിപ്പിച്ചിരിക്കുന്നു. അവൻ മനുഷ്യനെ സൃഷ്ടിക്കുകയും സംസാരം പഠിപ്പിക്കുകയും ചെയ്തു. സൂര്യ-ചന്ദ്ര സഞ്ചാരം നിശ്ചിത നിയതത്വ പ്രകാരമാണ്; വൃക്ഷ, താരകങ്ങൾ അല്ലാഹുവിനു സാഷ്ടാംഗമർപ്പിക്കുന്നുണ്ട്. വാനലോകങ്ങളെ അവൻ ഉയർത്തുകയും തൂക്കത്തിൽ നിങ്ങൾ ക്രമക്കേട് കാട്ടാതിരിക്കാൻ നീതിയുടെ തുലാസ് സ്ഥാപിക്കുകയും ചെയ്തിരിക്കുന്നു. നിങ്ങൾ നീതിയോടെ തൂക്കം ശരിപ്പെടുത്തുകയും തുലാസിൽ കുറവുവരുത്താതിരിക്കുകയും വേണം.

ഭൂമിയെ അല്ലാഹു മനുഷ്യർക്ക് വേണ്ടിയുണ്ടാക്കി. അതിൽ പഴങ്ങളും കൂമ്പാളകളുള്ള ഈന്തവൃക്ഷങ്ങളും വൈക്കോലുള്ള ധാന്യങ്ങളും സുഗന്ധച്ചെടികളുമുണ്ട്. അപ്പോൾ നിങ്ങൾ ഇരു കൂട്ടരുടെയും -ജിന്ന്, മനുഷ്യൻ- നാഥന്റെ ഔദാര്യങ്ങളിൽ നിന്ന് ഏതാണ് നിങ്ങൾ വ്യാജമാക്കുക? കലം പോലെ, മുട്ടിയാൽ മുഴങ്ങുന്ന ഉണക്കക്കളിമണ്ണിൽ നിന്ന് മനുഷ്യനെയും പുകയില്ലാത്ത തീജ്വാലയിൽ നിന്ന് ജിന്നിനെയും അല്ലാഹു പടച്ചു; അപ്പോൾ നിങ്ങളിരുകൂട്ടരുടെയും നാഥന്റെ ഔദാര്യത്തിൽ നിന്ന് ഏതാണ് നിങ്ങൾ വ്യാജമാക്കുക?

രണ്ട് വീതം ഉദയസ്ഥാനങ്ങളുടെയും അസ്തമനസ്ഥാനങ്ങളുടെയും രക്ഷിതാവാണവൻ. അപ്പോൾ നിങ്ങളിരുവരുടെയും നാഥന്റെ ഏതനുഗ്രഹമാണ് നിങ്ങൾ വ്യാജമാക്കുക? ഇരുജലാശയങ്ങൾ അന്യോന്യം സംഗമിക്കുംവിധം അവൻ അയച്ചുവിട്ടു- അവ രണ്ടിനും മധ്യേ അതിക്രമിച്ചുകടക്കാത്ത ഒരു പ്രതിരോധമുണ്ട്. അപ്പോൾ നിങ്ങളിരുകൂട്ടരുടെയും നാഥന്റെ ഏത് ഔദാര്യമാണ് നിങ്ങൾ നിഷേധിക്കുക?

കൊല്ലപ്പെട്ട യുവ മോര്‍ച്ച നേതാവിന്റെ ഭാര്യയുടെ താത്കാലിക ജോലി നിയമനം റദ്ദാക്കിയ നടപടി പിന്‍വലിച്ച് സിദ്ധരാമയ്യ സര്‍ക്കാര്‍. മുന്‍ കര്‍ണാടക സര്‍ക്കാര്‍ താത്ക്കാലിക നിയമനങ്ങള്‍ റദ്ദാക്കിയ നടപടിയെ തുടര്‍ന്നായിരുന്നു യുവമോര്‍ച്ച നേതാവ് പ്രവീണ്‍ നെട്ടാരുവിന്റെ ഭാര്യ നൂതന്‍കുമാരിക്ക് ജോലി നഷ്ടമായത്.

താത്ക്കാലിക ജീവനക്കാരുടെ നിയമനം റദ്ദാക്കുന്നത് പുതിയ സര്‍ക്കാര്‍ അധികാരമേല്‍ക്കുന്ന സാഹചര്യത്തില്‍ സാധാരണ നടപടിയാണെന്ന് സിദ്ധരാമയ്യ വ്യക്തമക്കി. ഇവര്‍ക്ക് പുറമെ മറ്റ് 150 താത്ക്കാലിക ജീവനക്കാരെയും ജോലിയില്‍നിന്ന് മാറ്റിയിരുന്നു. അതേസമയം നൂതന്‍ കുമാരിയുടെ വിഷയം ഒരു പ്രത്യേക സാഹചര്യമായി കണക്കാക്കി അവരെ പുനർനിയമിക്കുമെന്നും അദ്ദേഹം പറഞ്ഞു.

നോട്ട് നിരോധനത്തിന്റെ ഓർമ്മകളിലേയ്ക്ക് തിരിച്ചു കൊണ്ടു പോകും വിധം റിസർവ് ബാങ്ക് ഓഫ് ഇന്ത്യ (ആർബിഐ) 2000 രൂപ നോട്ടുകൾ പിൻവലിച്ചതോടെ വീണ്ടും കറൻസി നോട്ടുകൾ മാറ്റി വാങ്ങുന്നത് സംബന്ധിച്ച ആശങ്കയിലാണ് ആളുകൾ. സെപ്തംബർ 30നകം 2000 രൂപ നോട്ടുകൾ മാറ്റി വാങ്ങാനോ അക്കൗണ്ടുകളിൽ നിക്ഷേപിക്കാനോ ആർബിഐ അനുവദിച്ചിട്ടുണ്ടെങ്കിലും നോട്ടുകൾ പിൻവലിച്ചത് ആളുകൾക്കിടയിൽ വലിയ ചർച്ച ആയിട്ടുണ്ട്. പെട്രോൾ പമ്പ് ജീവനക്കാരും കടയുടമകളും 2000ന്റെ നോട്ടുകൾ സ്വീകരിക്കാത്ത സംഭവങ്ങൾ വിശദീകരിച്ച് ധാരാളം പോസ്റ്റുകൾ വിവിധ സാമൂഹ്യ മാധ്യമങ്ങളിൽ വരുന്നുണ്ട്.

ഇതിനിടെയാണ് ഒരു സ്ത്രീയും കടയുടമയും തമ്മിലുള്ള തർക്കം ഇന്റർനെറ്റ് ലോകത്തെ പൊട്ടിചിരിപ്പിക്കുന്നത്. 2000 രൂപ നോട്ട് സ്വീകരിക്കാൻ വിസമ്മതിച്ചതിന് കടയുടമയോട് താൻ തർക്കിച്ചതെങ്ങനെയെന്ന് യുവതി പറയുന്നത്.സ്ത്രീയുടെ ഉറ്റസുഹൃത്താണ് ഈ കഥ ട്വിറ്ററിൽ പങ്കിട്ടത്.

സ്‌ക്രീൻഷോട്ടിന്റെ ഉള്ളടക്കം ഇതാണ് : ഇന്ന് ഞാൻ ലേയ്‌സ് ചിപ്‌സ് വാങ്ങാനാണ് കടയിൽ പോയത്. പക്ഷെ കടയുടമ 2000 രൂപ നോട്ട് സ്വീകരിക്കില്ല എന്ന് പറഞ്ഞു. ഇത് കേട്ട ഞാൻ വളരെയധികം പ്രകോപിതയായി, നോട്ടുകൾ സെപ്റ്റംബർ 30 വരെ സാധുവാണെന്ന് ഞാൻ അയാളോട് തർക്കിച്ചു. പിന്നീടാണ് കടയുടമ കാര്യം പറയുന്നത്, ‘നിങ്ങൾ പറഞ്ഞതെല്ലാം ശരിയാണ്, പക്ഷേ ഈ നോട്ട് കീറിയതാണ്’ എന്ന്. അതോടുകൂടി ഞാൻ നിശബ്ദമായി അദ്ദേഹത്തിന് യുപിഐ വഴി പണം നൽകി സാധനവുമായി തിരിച്ച് വന്നു.

ഓൺലൈനിൽ ഇക്കാര്യം പോസ്റ്റിട്ടതോടെ സോഷ്യൽ മീഡിയയിൽ രസകരമായ നിരവധി കമന്റുകളാണ് വരുന്നത്. ഈ പോസ്റ്റ് ഏകദേശം 26400ൽ അധികം ആളുകളാണ് കണ്ടത്. നിരവധി ഉപയോക്താക്കൾ ചിരിക്കുന്ന ഇമോജികൾ കമന്റിൽ രേഖപ്പെടുത്തിയിട്ടുണ്ട്.

കുറച്ച് ദിവസങ്ങൾക്ക് മുമ്പ് 2000 രൂപ നോട്ട് നൽകിയതിന് ഒരാളെ ഓട്ടോറിക്ഷ ഡ്രൈവർ മർദിച്ചിരുന്നതായും വാർത്തകൾ വന്നിരുന്നു. അതുപോലെ പെട്രോൾ പമ്പ് ജീവനക്കാരൻ പെട്രോൾ നിറച്ചതിന് ശേഷം ഉപഭോക്താവുമായി 2000 രൂപ നോട്ടിന്റെ പേരിൽ തർക്കമുണ്ടായതും വാർത്തയായിരുന്നു.

ബംഗളൂരു: ആർ.എസ്.എസിനെ നിരോധിക്കുമെന്ന് കർണാടക സർക്കാർ പറഞ്ഞിട്ടില്ലെന്ന് മുഖ്യമന്ത്രി സിദ്ധരാമയ്യ. മന്ത്രിയായ പ്രിയങ്ക് ഖാർഗെയുടെ പ്രസ്താവന വലിയ ചർച്ചയായ സാഹചര്യത്തിലാണ് വിശദീകരണവുമായി സിദ്ധരാമയ്യ രംഗത്തെത്തിയത്. സമൂഹത്തിൽ സമാധാനവും സഹവർത്തിത്വവും തകർക്കുന്ന എതൊരു സംഘടനക്കെതിരെ ശക്തമായ നടപടിയുണ്ടാകും. ആർ.എസ്.എസ് നിരോധനത്തെക്കുറിച്ച് പാർട്ടി ഒന്നും പറഞ്ഞിട്ടില്ലെന്നും അദ്ദേഹം വിശദീകരിച്ചു.

മന്ത്രിയായ പ്രിയങ്ക് ഖാർഗെയുടെ പ്രസ്താവനയാണ് പുതിയ ചർച്ചകൾക്ക് വഴിവെച്ചത്. സദാചാര പൊലീസിങ് നടത്തുന്ന സംഘടന ഏതാണെങ്കിൽ നിരോധിക്കാൻ തങ്ങൾക്ക് ഒരു മടിയുമില്ല. അത് ആർ.എസ്.എസോ ബജ്‌റംഗ്ദളോ മറ്റേത് വർഗീയ സംഘടനയാണെങ്കിൽ അങ്ങനെത്തന്നെയാണെന്നും ഖാർഗെ പറഞ്ഞിരുന്നു.